成為男生之中的搶手貨！

成為男生之中的搶手貨！

如果你以為只要樣靚、聲甜、身材好，就一定有成千上萬嘅男生追你，咁你就大錯特錯喇！要點先成為男生超想要嘅女朋友？只要擁有以下幾個特質就得！

1. 你有自己嘅生活

每日24小時小鳥依人咁黏住男朋友唔等於溫柔，而係你無聊！你無自己嘅生活等於你無性格，亦無主見。由今日開始，為自己安排一啲令自己快樂嘅生活，唔好等人哋，尤其係男生去幫你嘅人生填顏色，只有咁做，你先可以擁有令男生一見難忘嘅自信笑容。

2. 適當的身體接觸

男生都鍾意同女生有身體接觸，但飛擒大咬只會嚇親人。面對心儀嘅男生，你可以適當地喺輕鬆閒聊時用手輕輕掂佢手背或前臂，甚至大脾近膝頭位置都可以，不過停留嘅時間唔好太長，掂嘅位置都唔好過晒火。

3. 你識得喺細微事上表達關心

人人都鍾意被關心，尤其天生比較粗心大意嘅男生。如果你能夠喺細微嘅事上幫到佢，佢一定會覺得好sweet，例如喺佢OT嘅時候為佢送上愛心靚湯。但要留意嘅係，關心唔好做得過火，事事都理，事事都管，如果唔係你就變咗做佢阿媽！

4. 你對性有堅持

無錯，男生通常係用下身諗嘢，但有時都會用吓腦嘅。唔好以為隨時ready同佢上床可以令佢更愛你，呢一個唔係唯一表現愛嘅方法，尤其係初相識嘅時候。性唔似行街睇戲咁簡單，你有自己嘅底線，先係一個值得尊重嘅女生。

5. 你令佢更有自信

咁唔等於你要盲目崇拜佢，例如你可以幫佢變得有型醒目，喺重要事情上俾中肯意見，而你都要識得尊重佢嘅意見，歡迎佢同你討論同表達見解。

6. 你唔煩

男生最怕就係你一日call佢幾百次！你覺得呢啲係溫馨，但佢會覺得你煩。尤其係喺返工返學嘅時間，你想佢用咩語氣答你個啲肉麻電話？！亦唔好無啦啦問佢愛唔愛你、有幾愛你呢啲幼稚問題！

7. 你只揀好男生

你只會對誠實、可靠同正經嘅男生有興趣。你認為只有識得尊重你，能同你一齊進步成長嘅男生先配得起你。

8. 你識得控制情緒

唔少女生的確比男生情緒化，呢點男生都明白，但如果你日日都情緒大起大落，男生又點會想同你一齊？你要學識控制情緒，須知道情緒化唔係大晒，當你失控時，馬上要提醒自己要冷靜。

9. 你唔會奄尖聲悶

你應該對人或事有要求，但絕唔係奄尖聲悶。如果世上無一件事你係睇得順眼嘅，你都唔會開心，而同你一齊嘅人都一樣唔會開心。學習咩事應該包容，咩事應該堅持，做個醒目嘅女友。