男友同屋企人唔夾！點算好？

男友同屋企人唔夾！點算好？

即使你同男朋友有幾close有幾sweet，但佢同你屋企人嘅關係始終好似水溝油……點都好似唔太係咁夾咁。以下幾個方法可能幫到你解決呢個煩惱！

1.我拍拖之前屋企人都唔係咁……

究竟係屋企人呷乾醋？定你有啲嘢忽略咗呢？試想像一下有個毛公仔／攬枕由細個開始陪咗你好多年，晚晚你都要攬住佢先瞓得着，有一日，外面嚟咗個陌生人要同你share 呢個「BB」，漸漸地「BB」仲要stay起佢嗰度好耐都唔還返俾你！就因為呢個陌生人嘅出現，令你被逼改變多年來嘅習慣……大概你嘅屋企人就係有呢種感覺！由細到大你都係Daddy、Mommy 嘅「BB」、兄弟姊妹嘅 buddy，你拍咗拖，一下子就改變咗同佢哋相處嘅時間同習慣，所以佢哋係要時間適應。

雖則話戀愛大過天，但你不妨試下抽多啲時間陪佢哋，聽吓佢哋嘅心事亦分享下同男朋友一齊嘅趣事，咁佢哋就會放心啲開心啲！千祈唔好因為拍拖而忽略屋企人啊！

2.良好關係要花心機去經營！

新年要向長輩拜年、生日要同長輩慶祝、中秋節要同長輩食飯。呢啲嘢小編講出嚟CG! 們可能會話：「我夠識啦！」。不過，你除咗知道呢啲係「指定動作」之外，你又有無了解過點解呢？

其實喺着重傳統嘅長輩眼中，呢啲節日就等於你要你男朋友記住100日相識記念日、第1次約會地點、第1次接吻日子等等……難道佢miss咗唔慶祝就會地震海嘯核泄漏？都不會！問題係你覺得佢無花心機記住！同樣地你爸爸媽媽都會咁樣諗！所以每逢大節日前不妨問定屋企人嘅 schedule，盡量安排男朋友出席，送少少禮物表示心意，咁男朋友喺佢哋心目中自然加分！

3.父母唔鍾意佢份工

事實係有好多父母都會緊張「未來女婿」嘅職業同前途，你可能覺得佢哋眼角高，但佢地關心嘅係你未來嘅生活質素。你不妨向佢哋透露一下男朋友嘅上進同努力，例如：「雖然佢仲係一個文員，但佢已經讀緊一個part-time degree，俾多啲時間佢，相信佢肯努力一定有更大嘅發展空間！」

4. 父母唔鍾意佢嘅行為／性格

有啲行為係小問題，例如：無禮貌、吸煙、講粗口等等，其實較易解決。即使呢啲行為唔係大錯，但某程度上都應該要注意，莫講話對住屋企人，就算係對任何人，都應該保持適當嘅尊重，呢方面就要靠你同男友溝通一下，要佢收歛一啲。

不過，如果係嚴重嘅性格／行為問題，例如佢成日講大話、講一套做一套，甚至吸毒／一發脾氣就打你等等，即使你肯包容佢忍讓佢，但始終問題較為嚴重，甚至會傷害到你！咁你就要認真同男友討論一下，希望佢可以改變自己。如果都係無改善，你就要考慮下仲同唔同佢繼續拍拖。

記住，屋企人嘅出發點都係愛你同想保護你，千祈唔好以不理睬甚至對立嘅態度去處理男友同家人之間嘅關係！咁樣對雙方同你自己都絕無益處！多啲溝通、了解同諒解，假以時日，問題自然可以迎刃而解。