熟女必讀！「與其嫁錯，不如不嫁」的7類男人

熟女必讀！「與其嫁錯，不如不嫁」的7類男人

女人年過三十又未嫁得出，睇住身邊友人一個個成家立室，都咪話唔心急。不過急還急，切忌「病急亂投醫」，隨便有人「應投」就唔理好醜急住將自己推銷出去，否則一旦嫁錯郎，賠上多年青春，就真係喊都無謂！

1. 比你年輕很多的男人

雖然《敗犬女王》中的無雙姐和盧卡斯成就了一對美滿的姊弟戀，不過現實歸現實，如果另一半年紀比你細很多，就算你keep得幾好，都會擔心有朝一日容顏漸去，被人誤會為他姊姊甚至媽媽；然後，當你老公身邊出現一堆「脆卜卜」的妙齡少女時，妳的自悲感將會提升到極點！再者，現實一點，後生的「花靚仔」仍未定性，會有心力和財力擔起一頭家嗎？

2. 太過有錢的男人

男人搵得越多未必越好，最重要是他願意花幾多在你身上。太過有錢的男人外來誘惑特別多，嫁左都未必安樂。

3. 太過花心的男人

男人心底裏花心不是問題(事實上世上應該無不花心的男人)，最重要是有自制力，不輕易受誘惑，會「知掟」識返屋企。

4. 性格與你太相似的男人

所謂「夾」不一定要性格相似志趣相投，如果兩個都是火爆性格，很容易會火星撞地球；反而二人一凹一凸、一剛一柔，才可以互補不足，在生活各方面可以更加合拍。

5. 背景與你差很遠的男人

所謂「竹門對竹門，木門對木門」，童話故事先會有「灰姑娘」，事實上如果家庭背景及學歷相差太遠，無論是生活習慣、興趣、見識等都會有一定距離，長久相處下來一定會出現問題。

6. 事業心太重的男人

事業對男人固然重要，但如果你真正想建立一頭「家」，而不是單純搵一張長期飯票，就最好揀個會照顧太太仔女的家庭型男人。

7. 食軟飯的男人

相信唔洗講，就算呢個年代女人搵錢能力幾強，都無必要奉旨「貼仔」，「拖鞋王」一定嫁唔過！